Пойтахтимиздаги Халқаро шахмат академиясида старт олган ўзбекистонлик биринчи гроссмейстер Георгий Агзамов хотирасига бағишланган XIV анъанавий халқаро турнирда 3-тур ўйинлари ниҳоясига етди. Дунёнинг 12та давлатидан 150 нафар "ақл гимнастикаси" усталари қатнашаётган ушбу мусобақанинг «А» гуруҳида ҳозирча ҳамюртимиз Нодирбек Абдусатторов йўқотишларсиз одимламоқда.

   Турнирнинг 1-тартиб рақамли иштирокчиси Абдусатторов 3-турда беларуслик Кирилл Спивакни мағлуб этди. Мусобақада ғолибликка асосий даъвогарлардан бири арманистонлик Шант Саргисян ҳам ҳозирча 100 фоизлик натижа қайд этиб турибди. У 3-турда озарбайжонлик халқаро мастер Мурадли Мухаммад устидан ғалаба қозонди. Шунингдек, яна бир арманистонлик шахматчи Тигран Арутунян ҳамда Эрон Ислом Республикаси вакили Ариан Голамилар ҳам 3 ўйиндан 3 очко жамғарган ҳолда етакчилар сафида.

   Ёш, умидли шахматчимиз Хумоюн Бекмуродовнинг 2,5 очко билан 5-8-ўринлардан жой олиб турганлиги таҳсинга лойиқ. Ҳамюртларимиздан Нодирбек Ёқуббоев ҳамда Бобир Сатторовлар ҳам худди шунча очко жамғарган.

   Мусобақа давом этмоқда.