Бухоро вилоятига қилинган ташриф натижадорлигини ошириш юзасидан ташкил этилган видеоселектор йиғилиши аввалида Шавкат Мирзиёев ўзбекистонлик спортчиларнинг Париж Олимпиадасида эришган натижаларига тўхталиб, ютуқ билан бутун Ўзбекистон халқини табриклади.

«Токио олимпиадасидан кейин яхши ният билан топ-15 га кирамиз деб, олдимизга катта мақсад қўйган эдик. 208 та давлат вакиллари қатнашган мусобақада спортчиларимиз юксак матонат, маҳорат ва ирода кўрсатиб, дунёда 13-ўрин, Осиёда 4-ўрин, туркий, мусулмон ва МДҲ давлатлари орасида 1-ўринни эгаллади. Бир йўла 3 нафар спортчимиз «икки карра олимпия чемпиони» деган юксак шарафли номга сазовор бўлди.

 

Бу Янги Ўзбекистон ёшлари нимага қодир эканини бутун дунёга кўрсатиб, уларнинг натижалари тарихимизда зарҳал ҳарфлар билан муҳрланди.

 

Барча спортчиларимиз, уларнинг ота-оналари, устоз ва мураббийлари Янги Ўзбекистоннинг чинакам қаҳрамонларидир! Улар билан ҳар қанча фахрлансак арзийди, улар бизнинг ғуруримиз!», деган Президент йигʼлиш кириш соʼзида.