Ижтимоий тармоқларда 28 июль куни Тошкентдаги «Анҳор» паркида осмондан ленталар ёғилиши ҳақида видео тарқалди.

Маълум бўлишича, Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси томонидан мазкур ҳолат ўрганилган.

Хабарга кўра, белгиланган санада паркдаги «Амфитеатр»да «лента-шоу» уюштирилиши, бунда аниматорлар томонидан ленталарни айлантириб, томоша кўрсатилиши, шунингдек, «осмондан ленталар ёғилиши» режалаштирилган.

Айнан «ленталар ёмғири»ни уюштиришдан мақсад жамоатчилик эътиборни жалб қилиш бўлган.

Байрам ташкилотчиларига бу каби шоулар атроф-муҳитнинг ифлосланишига сабаб бўлиши, экология учун зарарли эканлиги тушунтирилган.

Якунда «лента-шоу» бекор қилинган. Бундан ташқари, блогерлар томонидан тарқатилган видеолар ўчириб ташланган.