Куни кеча ижтимоий тармоқларда муҳокама қилинган видео бўйича депутатлар ҳам ўз фикрларини билдирди.

Жумладан, спикер ўринбосари Одилжон Тожиев ўз блогида спикер тўғри қарор қабул қилганини ёзади.

«Аслида ялпи мажлисни ўтказиш билан боғлиқ Регламентга кўра, танаффус эълон қилиниши масаласи овозга қўйилмайди.

 

Бироқ бугун Раислик қилувчи депутатларнинг фикри, нуқтаи назарини ўрганиш мақсадида сўровнома ўтказишга қарор қилди», дейди у.

Тожиев «депутатларнинг 100 фоизи мажлис давом эттирилишини қўллаб-қувватлаганида, йиғилиш, шубҳасиз, давом эттирилган бўларди» дея қатъий таъкидлар экан, танаффусни хоҳлаган депутатларнинг талаби инобатга олинганини қуйидагича оқлайди:

«22 нафар депутат танаффус эълон қилинишини маъқуллаб, овоз бердими, демак, камида шунча вакил қонун лойиҳаларини суст кайфиятда кўриб чиқарди».

Шунингдек, у тармоқдаги муҳокамалардан ажабланганини билдирган:

«Тармоқдаги муҳокамаларни ўқиб, тушликка нима еганим ҳам эсимдан чиқиб кетди)) Ўртоқлар, тушлик қилдингларми ўзи? 😉«

«Миллий тикланиш» ДП МК раиси Алишер Қодиров ҳам ўз блогида бу масалага изоҳ ёзиб ўтган.

У ҳам регламент бўйича ялпи мажлисга соат 13:00 да танаффус эълон қилиниши кераклигини айтади.

«Спикер мажлисга раислик қилувчи сифатида, ўз ваколатидаги ҳуқуқни депутатлар билан маслаҳатлашишга қарор қилди ва бу ҳолатда 1 нафар депутат қарши бўлсаю, буни асосласа, фикрни инобатга олиш ёки олмаслик Спикернинг ҳаққи ҳисобланади», дейди у.

Қодиров ҳам ёзган изоҳи якунида жамоатчиликнинг бефарқ бўлмаётганидан хурсандлигини таъкидлайди:

«Бизни кузатишингиз ишимизни самаралироқ қилади. Фақат шу шаклда, биргаликда Парламентни ҳақиқий Халқ уйига айлантиришимиз мумкин».