Федерал қидирув бюроси Пенсилвания штати Бутлер шаҳрида сайловолди ташвиқоти пайтида Дональд Трампни отган шахс 20 ёшли Томас Метю Крукс эканлигини маълум қилди.

Маълум бўлишича, шу ерлик бўлиб, Республикачилар партияси тарафдори бўлган.

Маълумот учун, Трамп ҳам республикачи ҳисобланади.

Бироқ Томас уч йил олдин Демократик партияни қўллаб-қувватловчи АcтБлуе ташкилотига атиги 15 доллар бўлсада, пул хайрия қилган.

Таъкидлаш лозим, у отган ўқ Трампнинг қулоғига тегган. Йигитча ўқ отишни тўхтатмаган. Натижада, митингга йиғилганлардан бири ўқ тегиши натижасида вафот этган, яна икки киши оғир яраланган. Қотилнинг ўзи эса Махфий хизмат ходимлари томонидан отиб ўлдирилган.

Ҳодиса вақтида йигитчанинг ёнида ҳеч қандай ҳужжат бўлмаган. Унинг шахси ДНК орқали аниқланган.

Томас Крукс ким эди? У ота-онаси билан суиқасд содир этилган жойдан тахминан 70 км узоқликда жойлашган Байтел-Паркда яшаган. Томас 2022 йилда у мактабни тугатиб, математика ва табиий фанларда эришган юқори натижалари эвазига 500 доллар мукофот олган. Яъни, у мактабнинг аълочи ўқувчиларидан бири бўлган.

Мактабдан кейин Крукс қариялар уйининг ошхонасида ишлаган.

Америка матбуотининг ёзишича, суиқасд вақтида Крукс қурол ва портловчи қурилмалар тасвирланган видеоларни чоп этувчи, миллионлаб обуначиларга эга YouTube канали, Demolition Ranch логотипи туширилган футболкада бўлган.

Манбаларга кўра, ҳуқуқ-тартибот идоралари Томас Крукс отишмада ишлатган қуролни унинг отаси олти ойдан кўпроқ вақт олдин қонуний равишда сотиб олганини аниқлаган.

«Биз ҳозирча унинг мақсадини аниқлаганимиз йўқ», деган ФҚБнинг ҳудудий ходими.

Унинг таъкидлашича, тергов бир неча ой давом этиши мумкин. Терговчилар Крукснинг бу ишни қилишига нима ундаганини аниқлаш учун бор кучларини аямайди.

Томаснинг отаси Метю Крукс CNN телеканалига берган интервьюсида у нима бўлганини мутлақо билмаслигини ва ўғли ҳақида матбуотга гапиришдан олдин ҳуқуқ-тартибот идоралари билан гаплашиши кераклигини айтган.

Суиқасддан сўнг, якшанбага ўтар кечаси полиция Круксларнинг уйини атрофдаги уйлар билан бирга ўраб олган ва барча қўшниларни зудлик билан эвакуация қилган. Изоҳ сўраганларга эса «уйдан портловчи мосламалар топилди» дея жавоб берилган.

Олдинроқ Дональд Трампга суиқасд уюштирилгани ҳамда Шавкат Мирзиёев бу ҳаракатни кескин қоралагани ҳақида хабар берилган эди.