Президент Қарори билан 2024/2025-ўқув йилидан бошлаб мактабларда ота-оналарнинг фарзанд тарбияси борасидаги билимини оширишга қаратилган «Намунали ота-оналар мактаби» лойиҳаси амалга оширилади.

Мазкур таълим масканларида «Фарзанд тарбиясида ота-онанинг масъулияти» мавзусида тарбия ҳафталиклари ҳам ўтказилади.

Бундан ташқари, 2024 йил 1 декабргача:

➖ ўқувчиларда «ҳуқуқбузарликка қарши иммунитет»ни шакллантиришда «мактаб – ота-она – маҳалла» ҳамкорлиги занжирини яратиш бўйича илмий асосланган ўқув ва оммабоп услубий тавсиялар ишлаб чиқилади;

➖ ота-оналарнинг фарзанд тарбиясига оид дунёқарашини кенгайтиришга хизмат қиладиган халқчил тилдаги адабиётлар яратилади.

Жорий йилнинг декабрь ойида эса «Тарбия – шахс маданий-маънавий камолотининг мезони» мавзусида халқаро форум ўтказилади.

Шунингдек, қарорга биноан 2025 йил якунигача ота-оналар, ўқитувчилар ва ўқувчилар учун ёшлар тарбиясига оид рақамли контентларни жойлаштириш мақсадида «milliytarbiya.uz» электрон платформаси ва унинг мобил версияси ишлаб чиқилади.