Сирдарёда «Ҳашартепа» (IХ – ХII асрга оид) ёдгорлигининг 6,4 м/куб қисми ҳожатхона ва ҳаммом қуриш учун учун қисман бузилган. Бу ҳақида Бош прокуратура хабар берди.

Маълум бўлишича, маданий мерос объектларининг яна бир нечта қисми турли сабабларга кўра зарарланган.

Жумладан:

◻️ Қашқадарёда «Кофиртепа-2» (VII – ХIII асрга оид) ёдгорлигининг 2,4 м/куб, «Бештерактепа»нинг (IХ – ХII асрларга оид) 6 м/куб ҳамда «Хонтепа»нинг (ХI – ХIII асрларга оид) 189 м/куб қисми уй-жой қуриш учун;

◻️ Жиззахда «Томошотепа-2» (IV – V асрларга оид) ёдгорлигининг 14 м/куб қисми ҳожатхона ҳамда «Қоратепа»нинг (V – VI асрларга оид) 30м/куб қисми иссиқхона қуриш учун;

◻️ Навоийда «Ғазғонтепа» ёдгорлигининг 16 м/куб қисми мобил компания антеннаси, «Нонвойлартепа-2»нинг 5,3 м/куб, «Калтепа»нинг (V – VIII асрларга оид) 23 м/куб ҳамда «Ясилтепа»нинг (III – ХI асрларга оид) 20 м/куб қисми хўжалик иншоотлари қуриш учун;

◻️ Тошкент вилоятида «Номсизтепа-1» ёдгорлигининг 15 м/куб қисми хожатхона, «Номсизтепа-2»нинг 1,92 м/куб қисми иссиқхона қуриш учун қисман бузилган.

Хабарга кўра, юқоридаги жами 12 та ёдгорликка 8,3 млрд. сўмлик зарар етказилгани аниқланиб, жиноят ишлари қўзғатилган ва ҳозирда дастлабки тергов ҳаракатлари олиб борилмоқда.