Бугун, 21 июнь куни Вазирлар Маҳкамасида Президентнинг тегишли қарорига асосан, лавозимларга тайинланган ва тасдиқлаган бир қатор номзодлар Бош вазир Абдулла Арипов томонидан ҳукумат аъзоларига таништирилди.

Булар қуйидагилар:

Абдуваққос Воҳидович Рафиқов – Вазирлар Маҳкамаси ҳузуридаги Саноат, радиация ва ядро хавфсизлиги қўмитаси раиси.

Бунгача у «Ўзавтосаноат» АЖ бошқарув раисининг маҳаллийлаштириш кооперация алоқаларини саноатда кенгайтириш ва ахборот технологиялари масалалари бўйича биринчи ўринбосари лавозимида ишлаган.

Азим Исраилович Ахмедхаджаев – Вазирлар Маҳкамаси ҳузуридаги Атом энергияси агентлиги директори.

Бунгача у Энергетика вазирининг биринчи ўринбосари лавозимида фаолият юритган.

Олимжон Мухамаджанович Умаров – Рақамли технологиялар вазирининг биринчи ўринбосари.

Жамшид Юнусович Турсунов – Транспорт вазирлиги ҳузуридаги Автомобиль йўллари қўмитаси раиси.

Бунгача у Бухоро вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари сифатида ишлаган.

Амриддин Насриддинович Абдурахмонов – Транспорт вазирлиги ҳузуридаги Автомобиль йўллари қўмитаси раисининг йўл хўжалиги соҳасига илғор хорижий тажрибаларни татбиқ этиш ва рақамлаштириш масалалари бўйича ўринбосари. Мазкур номзод Вазирлар Маҳкамасининг тегишли қарорига асосан тайинланган.