Ўзбекистонда мактаб ўқувчилари орасида математика ва бошқа аниқ фанларни оммалаштиришга йўналтирилган «Ал-Жабрнинг отаси» номли янги илмий-оммабоп журнал нашр этилди. Журнал Муҳаммад ибн Мусо ал-Хоразмий шахси ва унинг фанга қўшган илмий ҳиссасига бағишланган бўлиб, табиий фанларни оммалаштиришга интилаётган ўқитувчилар, ўқувчилар ва кенг илмий жамоатчиликка мўлжалланган.

«Ал-Жабрнинг отаси» Ўзбекистон Фанлар академияси ва Қозоғистон Миллий Фанлар академияси кўмагида чоп этилди. Журналнинг қозоқ тилидаги нашри 2023 йили чиқарилган ва Қозоғистон бозорида анча катта машҳурликка эришган. Эндиликда журнал «Ал-Жабрнинг отаси» номи билан ўзбек аудиториясига ҳам тақдим этилмоқда.

«Мақсадимиз – буюк аждодлар йўлини давом эттириш. Ал-Хоразмий дунё илм-фанига улкан ҳисса қўшган олим эди. Кузатувларимга кўра, ўзбек ва қозоқ ёшлари ўртасида умумий жиҳатлар кўп. Таълим тизими, фанлар ва характер ўхшаш. Биз дуч келадиган муаммолар ҳам қарийб бир хил. Умид қиламанки, ушбу журнал ўқувчиларга фанларни қизиқарли ва осон тарзда ўрганишларига ёрдам беради», дейди Қозоғистон Миллий Фанлар академияси вице-президенти журналнинг Ўзбекистонда чоп этилишига юқори баҳо бериб. Нашр аниқ фанларни ўзбек, қозоқ ва рус тилларида ўргатувчи «Қалан» платформаси кўмагида чоп этилмоқда.

Маълумот учун «Қалан» – халқаро платформа бўлиб, математика фанларини қозоқ, ўзбек ва рус тилларида ўқитиш имконини беради. Онлайн платформада мактаб ўқувчилари ўқитувчилар ва сунъий интеллектга асосланган чат-бот ёрдамида суҳбатлашишади. Ҳозирда Қозоғистон, Ўзбекистон ва Россияда 600 мингдан ортиқ фойдаланувчи платформага уланган.

«Ал-Жабрнинг отаси» журналида турли қийин мавзулар қизиқарли тарзда тушунтирилган, рангли суратлар ва янгича ёндашув билан ёзилган мақолаларни ўқишингиз мумкин. Нашр ўзбек матбаасида оқсаётган йўналиш – ўқувчилар учун чиқарилувчи илмий-оммабоп журналлар ичида ўз ўрнини ва мухлисларини топишига умид қилинмоқда.