Ихтисослаштирилган таълим муассасалари агентлигининг Президент мактабларига кириш учун тайёрлайдиган расмий ўқув курслари мавжуд эмас.

Маълум бўлишича, ижтимоий тармоқларда «Президент мактабларига тайёрлаймиз», «Президент мактабларига кириш учун оралиқ «репетицион» тест синовлари» қабилидаги эълонлар асосида «Президент мактаблари» бренди остида тайёрлов курсларининг эълонлари жуда кўп учрамоқда.

Бундан ташқари, ижтимоий тармоқларда Президент мактаблари номидан фаолият юритиб келаётган турли канал ва саҳифалар фаолияти кўпайган.

«Бу каби Телеграм каналлар ва тайёрлов курсларининг Президент мактабларига ҳеч қандай алоқаси йўқ», дейилади агентлик хабарида.

Таъкидланишича, Президент мактабларига қабул бўйича барча тасдиқланган маълумотлар Ихтисослаштирилган таълим муассасалари агентлигининг расмий саҳифалари орқали бериб борилади.

Қабул жараёнлари, квоталар, имтиҳонлар ва бошқа маълумотларни ҳам айнан ушбу саҳифалар орқали кузатиб бориш мумкин.