Олдинроқ Ўзбекистон давлат спорт академияси ташкил этилиши ҳақида хабар берилган эди.

Мазкур академия тузилмасида Ахборот-кутубхона марказини ўз ичига олувчи юридик шахс мақомига эга бўлмаган Ўзбекистон тарихи ва хорижий тилларни ўқитиш маркази ҳам фаолият юритади.

Бу ерда спортчиларга хорижий тиллар ва Ўзбекистон тарихи бўйича чуқурлаштирилган тарзда сабоқ берилади

Шунингдек, академия тизимида давлат муассасаси шаклидаги Давлат спорт тиббиёти илмий-амалий маркази ҳам ташкил этилади.

Академияга талабаларни қабул қилиш параметрлари Республика олий таълим муассасаларига ўқишга қабул қилишнинг давлат буюртмаси доирасида белгиланади.

Талабаларининг контингенти, биринчи навбатда, олимпия ва паралимпия спорт турларига тайёрлаш марказларида ривожлантирилаётган спорт турлари бўйича сўнгги бир йилда Жаҳон, Осиё ва Ўзбекистон чемпионатларида ғолиб ва совриндор бўлган олимпия ва паралимпия коллежлари, шунингдек, умумий ўрта, ўрта махсус ва профессионал таълим муассасаларининг битирувчилари орасидан уларнинг спорт натижаларига қараб, саралаш (селекция) асосида шакллантирилади.

Олимпия ва паралимпия коллежларидан саралаб олинган битирувчилар Академияга тўғридан-тўғри иккинчи босқичга қабул қилинади.

Бундан ташқари, Академия талабалари спорт ва оммавий жисмоний тарбия тадбирларининг календарь режасига мувофиқ ўтказиладиган республика мусобақаларида тўғридан-тўғри иштирок этади.

Битирувчиларга тренерлик фаолияти билан шуғулланиш учун малака сертификати (диплом), истисно тариқасида, тўғридан-тўғри 6 йилга берилади.