Кучли шамол натижасида Самарқанд ва Жиззах вилоятларидаги айрим электр тармоқларида носозлик юзага келган. Бу ҳақда Энергетика вазирлиги матбуот хизмати хабар берди.

Маълум қилишича, ушбу ҳудудларда юз берган кучли шамол баъзи бир электр қурилмаларида носозликларга сабаб бўлган. Натижада Самарқанд вилоятида 457 МВт (114 минг 250 та истеъмолчи), Жиззах вилоятида эса 64 МВт (16 мингта истеъмолчи) қувват билан электр таъминотида вақтинчалик қисқа муддатли узилишлар кузатилмоқда.

«Махсус бригадалар томонидан таъмирлаш ишлари олиб борилмоқда. Носозликлар қисқа вақт ичида босқичма-босқич бартараф қилиниб, истеъмолчиларнинг электр таъминоти қайта тикланади», дейилади хабарда.