Одам савдоси жиноятини содир этганликда айбланиб, Ички ишлар вазирлиги томонидан қидирувда бўлган 1985 йилда туғилган Дилноза Умарова ва 2017 йилдан буён Ички ишлар вазирлиги қидирувида бўлган 1983 йилда туғилган Мавлуда Ўлмасовалар Истанбул шаҳридаги Бош консулхона ходимлари иштирокида Истанбул халқаро аэропортидан Ўзбекистонга депортация қилинди.

Мазкур фуқаролар Ўзбекистон ва Туркия Ички ишлар вазирликлари ҳамкорлигида ўтказилган тезкор тадбир давомида жорий йилнинг 10 январь куни қўлга олинган эди. Ушбу шахсларнинг хатти-ҳаракатларидан жабр кўрган фуқаролардан Истанбул шаҳридаги Бош консулхонага ёки Ички ишлар вазирлигига мурожаат қилиш сўралган.