Тошкент шаҳрининг атмосфера ҳавоси таркибида зарарли ПМ2,5 дисперс заррачалари меъёрдан бир неча ўн баробар кўпайгани муносабати билан Санепидқўмита улардан ҳимояланиш бўйича тавсиялар берди.

Қайд қилинишича, ПМ2,5 заррачалар нафас йўлидан ўтиб, альвеолалар ва ўпка капиллярларига, тизимли қон оқимига, турли аъзоларга кириб, турли тўқималарнинг ҳужайраларига бевосита маҳаллий таъсир кўрсатади.

Атмосфера ҳавосида ушбу заррачаларнинг юқори концентрацияси яллиғланиш, канцероген, тератоген, цитотоксик таъсирга эга бўлиб, аллергопатологиянинг ривожланишига ҳисса қўшади ва инсоннинг умр кўриш давомийлигига таъсир қилади.

Мутахассислар ПМ2,5 дисперс заррачаларидан ҳимояланиш бўйича бир қатор тавсияларни берган.

Жумладан, хона ёки иншоотларнинг пол ва токчалари, улар ичидаги буюм ҳамда ашёларни нам латта билан тозалаб туриш. Уй ёки бино ичига, атрофига сув солинган идишлар қўйиш ҳам чанг даражасини пасайтиришга хизмат қилади. Қолаверса, нам сочиқларни осиб қўйиш мумкин.

Деразаларни ёпиқ ҳолда сақлаш. Айниқса, кечаси ва эрта тонгда эшик ва ойналарни зич ёпиш. Кўпроқ сув ичиш, очиқ ҳавода ҳаракат қилишни чеклаш. Тез-тез душ қабул қилиш, айниқса, ташқаридан уйга киргач, бу жараён нафас олишни енгиллаштиради. Оғиз ва бурун бўшлиғини тузли эритма билан ювиб ташлаш.

Нафас олиш тизими касалликларига чалинганлар тиббий ниқобдан фойдаланиши ва уларни ҳар 2 соатда алмаштириши зарур. Кўзларни ҳам ювиш тавсия этилади. Айниқса, линзадан фойдаланувчилар учун бу жуда муҳим.