Маълум қилинишича, Болалар омбудсмани котибиятига Бухоро вилояти Шофиркон туманида яшовчи С.Н. (аёл) кичик ёшдаги фарзандини 2 йилдан бери калтаклаб, қийнаб келаётгани баён этилган мурожаат ва видео материаллар келиб тушган.

Ҳолат юзасидан Шофиркон тумани ички ишлар органлари олиб борган терговга қадар текширувда аниқланишича, С.Н.  фарзанди 2018 йилда туғилган С.Ф.ни бешикка боғлаган ҳолатда таёқ ва бошқа жисмлар билан муттасил равишда узоқ вақт давомида (2022 йилнинг март ойларидан 2023 йил ноябрь ойигача) калтаклаб, қийнаб келган.

«Мазкур ҳолат юзасидан С.Н.га нисбатан ЖКнинг 110-моддаси 2-қисми, «а,в» бандлари (вояга етмаган, ожиз аҳволдалиги аён бўлган шахсни қийнаш) билан жиноят иши қўзғатилиб, ҳозирда Шофиркон тумани ИИБ томонидан дастлабки тергов ҳаракатлари олиб борилмоқда», дейилади хабарда.

Болалар омбудсмани мазкур ҳолат бўйича боланинг манфаатлари ишончли таъминланиши юзасидан ўз кузатувини давом эттиришини билдирди.