Хоразм вилояти ҳокимлиги томонидан Республика Маънавият ва маърифат маркази, «Жалолиддин Мангуберди» фонди билан ҳамкорликда Жалолиддин Мангуберди тарихига оид 5 та китобдан иборат китоблар жамланмаси тайёрланди.

Ушбу жамланмадан Ўзбекистон Республикаси Жамоат хавфсизлиги университети профессори Жумабой Раҳимовнинг «Мардлик ва жасорат тимсоли», Урганч давлат университети тадқиқотчиси Қудрат Машариповнинг «Жалолиддин Мангубердининг жаҳон сиёсий ва ҳарбий тарихидаги ўрни», Маънавият ва маърифат маркази Хоразм вилояти бўлими раҳбари, «Жалолиддин Мангуберди» фонди раиси Бекзод Абдиримовнинг «Хоразмийлар изини излаб…”, «Икки буюк саркарда ёхуд Жалолиддиндан Қутузгача”, Бекзод Абдиримов ҳамда покистонлик Васим Сажжад ҳаммуаллифлигидаги «Султон Жалолиддин Хоразмшоҳ Покистонда» номли асарлари ўрин олган.

Мазкур китоблар жамланмаси Хива шаҳрида бўлиб ўтадиган «Жалолиддин Мангуберди тарихининг янги саҳифаларини ўрганиш» мавзусидаги халқаро конференция олдидан халқимиз учун муносиб туҳфа бўлди дейиш мумкин.