Қамчиқ довонида юк автомобили иштирокида содир бўлган йўл-транспорт ҳодисаси оқибатида икки киши ҳалок бўлди. Бу ҳақда ИИВ ЙҲХХ ахборот хизмати хабар берди.

Маълум қилинишича, 9 январь куни соат 20:30 ларда Наманган вилоятининг Поп тумани ҳудудидан ўтувчи А-373 автомобиль йўлининг 225-километрида водий—Тошкент йўналишида ҳаракатланиб келаётган Шаcман русумли юк автомобили ҳайдовчиси 36 ёшли Н. тезликни оширгани сабабли руль бошқарувини йўқотган ва йўлни иккига ажратиб турувчи темир тўсиққа урилиб ағдарилган. ЙТҲ натижасида транспорт воситасида ёнғин юзага келган.

Ёнғин ўт ўчирувчилар томонидан бартараф этилган. Ҳодиса оқибатида ҳайдовчи Н. ва юк машинаси йўловчиси олган тан жароҳатлари туфайли воқеа жойида вафот этган. Ҳозирда ушбу ЙТҲ юзасидан суриштирув ишлари олиб борилмоқда.