Фарғонада аҳолига имтиёзли нархда сотилиши керак бўлган 774 млн сўмлик кўмир талон-торож қилинган

Сақлаш
14:54 / 13.12.2023 827 0

Фарғона ва Жиззах вилоятларида аҳолига имтиёзли нархда етказиб бериш учун ажратилган кўмирни талон-торож қилиш ҳолатлари аниқланди, дея хабар берди Бош прокуратура ҳузуридаги департамент.

 

Маълум қилинишича, департаментнинг Риштон туман бўлими томонидан терговга қадар текширув ўтказилган. Текширувда «Кўмир таъминот» МЧЖнинг Олтиариқ кўмир омбори мудири М.И. Риштон туманидан кўмир омборига бириктирилган жамоатчи вакил С.Э. ва бошқалар ўзраро тил бириктириб, куз-қиш мавсумида туман аҳолисига имтиёзли нархда етказиб бериш учун ажратилган умумий баҳоси 774,1 миллион сўмлик 2 578 тонна кўмирни сохта ҳужжатлар расмийлаштириш йўли билан бошқа шахсларга бозор нархида сотиб юборгани аниқланган.

 

Бундан ташқари, департаментнинг Мирзачўл туман бўлими томонидан ўтказилган терговга қадар текширувда «Кўмир таъминот» МЧЖнинг «Дўстлик» кўмир омбори масъул шахслари ва бошқалар 351 тонна кўмирни аҳолига имтиёзли нархларда сотилгани тўғрисида сохта ҳужжатлар расмийлаштиргани ҳам аниқланган.

 

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.

Изоҳ йўқ

Изоҳ қолдириш

Сўнгги янгиликлар

Барчаси

//