Қорақалпоғистон Республикасида жойлашган автомобилларга газ тўлдириш компрессор станциялари туну кун режимидан соат 6:00 дан 15:00 гача ишлаш режимига ўтмоқда. Бу ҳақда “Ҳудудгаз Қорақалпоғистон”га таяниб, KRuz.uz хабар берди.

Бу чеклов 9–14 декабрь кунлари ҳаво кескин совиб кетиши муносабати билан истеъмолчиларнинг табиий газга талаби ортиб, магистраль тармоқларда газ босими пасайишининг олдини олиш мақсадида киритилган.

Бунгача 4 декабрдан бошлаб Андижон вилоятидаги АГТКШлар иш вақти 6:00 дан 15:00 гача чекланганди.

Айни пайтда ижтимоий тармоқларда Тошкент шаҳридаги газ қуйиш шохобчалари фаолиятида ҳам узилишлар кузатила бошлагани ҳақида маълумотлар бор.

Шунингдек, Сурхондарё вилоятида метан газ қуйиш шохобчалари соат 8:00 дан 17:00 гача фаолият юритаётгани айтилмоқда.