Ўзбекистон Республикаси Ташқи ишлар вазирлиги Исроил-Фаластин можароси бўйича баёнот берди. Баёнотда вазирлик мавжуд вазиятда тинч аҳоли орасида кўплаб қурбонлар учраётганидан хавотирдалигини билдирган.

“Ўзбекистон Республикаси Ташқи ишлар вазирлиги Фаластин-Исроил можароси ҳудудида тинч аҳоли орасида кўплаб қурбонларга олиб келган ва бутун Яқин Шарқдаги вазиятни сезиларли даражада мураккаблаштирган ҳолат кескинлашганидан жиддий хавотир билдиради.

Биз курашаётган томонларни қуролли қарама-қаршиликни тез фурсатларда тугатиш ва инқирозни сиёсий ҳамда дипломатик воситалар орқали ҳал қилиш учун барча чораларни кўришга чақирамиз”, – дейилади баёнотда.

Бундан ташқари, вазирлик сўнгги воқеаларда ҳалок бўлганларнинг оила аъзоларига чуқур ҳамдардлик билдирган ва барча жароҳатланганларнинг тезроқ соғайиб кетишини тилаган.