Шавкат Мирзиёев Хитойда бўлиб ўтган XIX ёзги Осиё ўйинларида иштирок этган Ўзбекистон спорт делегацияси аъзоларига табрик йўллади.
 

“Аввало, Хитойнинг Ханчжоу шаҳрида ўтказилган XIX ёзги Осиё ўйинларида муносиб иштирок этиб, юксак натижаларни қўлга киритганингиз билан сиз азизларни, сизларнинг тимсолингизда бутун халқимизни чин қалбимдан самимий муборакбод этаман.

Сизларнинг жонажон Ўзбекистонимиз шарафини ҳимоя қилиш йўлида кескин кураш олиб бориб, улкан ютуқларга эришганингиз, ҳеч шубҳасиз, барчамизни, кўп миллатли халқимизни чексиз қувонтирди”, — деб бошланди табрик матни.
 

«132 нафар вакилимиз жами 71 та медални қўлга киритиб, ўтган Осиё ўйинларига нисбатан рекорд натижани қайд этганлари ҳам барчамизни қувонтиради”, — дейилади табрикда.
 

Давлат раҳбари ўзбекистонлик спортчилар Хитой Тайпейи, Баҳрайн, Шимолий Корея, Гонконг, Эрон, Индонезия, Қозоғистон, Қатар, Сингапур, Малайзия, Въетнам, Кувайт каби спорт соҳасида ривожланган давлатларни ортда қолдириб, умумжамоа ҳисобида Хитой, Япония, Жанубий Корея ва Ҳиндистондан кейин фахрли бешинчи ўринни эгаллаганини эътироф этди.
 

“Осиё ўйинларида эришилган бундай ютуқлар биз учун улкан аҳамиятга эга бўлиб, сизлар шу тариқа миллий спорт мактабимизнинг шон-шуҳратини, Ўзбекистон ёшларининг қандай буюк ишларга қодир эканини жаҳонга намоён этдингиз.

Ўз навбатида 2024 йил Парижда бўлиб ўтадиган 33-олимпия ўйинларида ҳам юксак чўққиларни забт этишингизга ишонаман!”, — дейди президент.

Маълумот учун, Хитойнинг Ханчжоу шаҳрида ўтказилган XIX ёзги Осиё ўйинларида қитъанинг 45 та давлатидан 11 минг нафар спортчи иштирок этди. Мусобақаларда Ўзбекистон терма жамоаси аъзолари 22 та олтин, 18 та кумуш ва 31 та бронза медалини қўлга киритди.