Навоий шаҳри ҳокими Муратхон Эгамқулов ўрнига Дилмурод Эргашев ҳоким этиб тайинланди. Бу ҳақда вилоят ҳокимлиги матбуот хизмати хабар бермоқда.

Дилмурод Эргашев 1979 йилда Самарқанд вилояти Пахтачи туманида туғилган. Навоий давлат кончилик институтини тамомлаган.

2017−2020 йилларда Кармана тумани ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари, 2020−2021 йилларда “Навоий кон-металлургия комбинати” ДК капитал таъмирлаш бошқармаси бошлиғининг саноат объектлари қурилиши бўйича ўринбосари лавозимларида фаолият юритган.

У мазкур лавозимга тайинлангунга қадар “Навоий кон-металлургия комбинати” акциядорлик жамияти капитал қурилиш бошқармаси бошлиғининг саноат объектларини қуриш бўйича ўринбосари вазифасида ишлаб келган.