Хотин-қизларга нисбатан қайд этилган тазйиқ ва зўравонлик ҳолатларининг 87 фоизи уларнинг оилаларида, 9 фоизи кўчаларда, 2,4 фоизи жамоат жойларида содир этилган. Бу ҳақида Маҳалла ва оилани қўллаб-қувватлаш вазирлиги ахборот хизмати хабар берди.

Қайд этилишича, 2021 йилда зўрлик ишлатишдан жабр кўрган шахсларни реабилитация қилиш ва мослаштириш марказларига мурожаат қилган 7 226 нафар фуқаролардан 3 320 нафарига психологик, 2 784 нафарига ҳуқуқий, 240 нафарига тиббий ва 879 нафарига бошқа ёрдамлар кўрсатилган.

Зўравонликдан жабр кўрган 32 154 нафар хотин-қизларга ҳимоя ордери берилган. Уларнинг 320 нафари вояга етмаган, 8 937 нафари 18-30 ёш орасида, 22 мингдан ортиғини 30 ёшдан ошган аёллар ташкил этмоқда.

1 833 та тазйиқ ўтказган, зўравонлик содир этган ёхуд уларни содир этишга мойил бўлган шахслар ҳимоя ордери талабларини бажармаганлиги учун Ўзбекистон Республикаси Маъмурий жавобгарлик тўғрисидаги кодексига кўра маъмурий жавобгарликка тортилган.