Россиянинг Ўзбекистондаги элчихонаси Марказий Осиё давлатларидан келган муҳожирлар сафарбарликка жалб этилиши айтилган хабарларга муносабат билдирди.

Элчихонанинг қайд этишича, Марказий Осиё давлатларидан келган меҳнат муҳожирларининг Россияда ҳарбий хизматга мажбурий чақирилиши ҳақида ёлғон маълумотлар тарқалмоқда.

«Россия Ички ишлар вазирлигининг сохта буйруғига таяниб, тегишли шахслар Россияда вақтинча бўлиб турган Ўзбекистон, Тожикистон ва Қирғизистон фуқаролари қисман сафарбар этилиши ҳақидаги ёлғон хабарларни тарқатмоқда. Агар улар шартнома тузишдан бош тортса, гўёки ишлашга рухсатномалари бекор қилиниши ва депортация қилиниши тўғрисида ёлғон маълумот бор», — дейилади хабарда.

Элчихона Россиядаги ўзбекистонликларни турли провокацияларга берилмасликка, фақат расмий маълумотларга ишонишга чақиради.