Ўзбекистон амалий санъат ва ҳунармандчилик тарихи давлат музейида Миллий сувенирлар фестивали бўлиб ўтмоқда.

Фестивал Президентнинг “Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида”ги фармони ижроси доирасида ўтказилмоқда.

Миллий либослар, ёғоч ўймакорлиги, кулолчилик, каштачилик, заргарлик, пичоқчилик каби халқ ҳунармандчилик маҳсулотлари кўргазмаси, турли маҳорат дарслари ҳамда фолклор-этнографик гуруҳларнинг бадиий чиқишлари ташкил этилган.

– Миллий сувенирлар савдосини йўлга қўйиш орқали республика музейлари ва маданий мерос объектларини тарғиб этиш мақсад қилинган, – дейди Нарзуллаевлар сулоласининг 7-вакили, Ўзбекистон Амалий санъат ва ҳунармандчилик тарихи давлат музейи кўчма кўргазмалар сектори мудири Дилноза Нарзуллаева. – Бу эса, айни пайтда, ҳунармандлар бандлигини таъминлашга, уларни моддий ва маънавий қўллаб-қувватлашга ҳам хизмат қилади.

Фестивал якунида ҳар бир ҳудуд бўйича алоҳида 1-, 2-, 3-ўринлар ғолиби аниқланиб, ташкилотчилар томонидан муносиб тақдирланади.