Shanxay hamkorlik tashkiloti Samarqand sammitida ishtirok etish uchun Tojikiston, Turkmaniston, Qirgʻiz Respublikasi, Xitoy Xalq Respublikasi davlat rahbarlari mamlakatimizga kelishdi.

14-sentyabr kuni yetib kelgan Qirgʻiz Respublikasi Prezidenti Sadir Japarovni Samarqand xalqaro aeroportida Oʻzbekiston Respublikasi Bosh vaziri Abdulla Aripov va boshqa rasmiy shaxslar kutib oldi. Oliy martabali mehmon Hazrati Xizr majmuasida Oʻzbekistonning Birinchi Prezidenti Islom Karimov qabriga gul qoʻyib, uning xotirasiga hurmat bajo keltirdi.

Shuningdek, 14-sentyabr kuni kechga Oʻzbekiston Respublikasi Prezidenti Shavkat Mirziyoyevning taklifiga binoan Xitoy Xalq Respublikasi Raisi Si Szinpin davlat tashrifi bilan mamlakatimizga keldi. Samarqand xalqaro aeroportida Xitoy yetakchisini davlatimiz rahbari kutib oldi. Kutib olish marosimida milliy kuy-qoʻshiqlar, raqslar ijro etildi. Tashrifning asosiy tadbirlari 15-sentyabr kuniga moʻljallangan boʻlib, bugun oliy darajadagi Oʻzbekiston-Xitoy muzokaralari boʻlib oʻtadi.

Tojikiston Respublikasi Prezidenti Emomali Rahmon bugun – 15-sentyabr kuni Shanxay hamkorlik tashkiloti Davlat rahbarlari kengashi majlisida ishtirok etish uchun Samarqand shahriga keldi. Xalqaro aeroportda oliy martabali mehmonni Oʻzbekiston Respublikasi Bosh vaziri Abdulla Aripov va boshqa rasmiy shaxslar kutib oldi. Tojikiston rahbari ham Hazrati Xizr yodgorlik majmuasiga tashrif buyurib, Birinchi Prezidentimiz Islom Karimov qabriga gul qoʻydi.

Shuningdek, bugun Oʻzbekiston Respublikasi Prezidenti Shavkat Mirziyoyevning taklifiga binoan Turkmaniston Prezidenti Serdar Berdimuhamedov Shanxay hamkorlik tashkiloti Davlat rahbarlari kengashi majlisida faxriy mehmon sifatida ishtirok etish uchun mamlakatimizga keldi.

Aeroportda oliy martabali mehmonni Oʻzbekiston Respublikasi Bosh vaziri Abdulla Aripov va boshqa rasmiy shaxslar kutib oldi. Tashrif dasturida Serdar Berdimuhamedov Hazrati Xizr majmuasiga tashrif buyurib, Birinchi Prezidentimiz Islom Karimov xotirasiga hurmat bajo keltirishi koʻzda tutilgan.