Prezident Matbuot kotibi Sherzod Asadov joriy yil 15-16-sentyabr kunlari Samarqand shahrida boʻlib oʻtadigan SHHT sammiti doirasida Oʻzbekistonga qaysi davlatlar rahbarlari tashrif buyurishini maʼlum qildi.

Unga koʻra, SHHT sammitida 8 ta davlat rahbarlar tashkilotga aʼzo sifatida, 3 ta davlat rahbarlari kuzatuvchi sifatida, 4 ta davlat rahbarlari esa mehmon sifatida ishtirok etadi.

«Kelgusi haftada Samarqand Shanxay hamkorlik tashkilotiga aʼzo mamlakatlar Davlat rahbarlari kengashining majlisiga mezbonlik qiladi. Ushbu tadbir SHHT yetakchilarining 2019-yildan buyon birinchi yuzma-yuz uchrashuvi boʻladi va Oʻzbekistonning tashkilotdagi raisligiga yakun yasaydi.

 

Oʻzbekiston raisligi davrida asosiy eʼtibor tashkilot doirasidagi hamkorlikning savdo-iqtisodiy aloqalarni mustahkamlash, sanoat kooperatsiyasini ilgari surish, transport-kommunikatsiya oʻzaro bogʻliqligini kengaytirish, raqamli transformatsiya va “yashil” iqtisodiyot, SHHTning xalqaro nufuzini mustahkamlash kabi eng muhim ustuvor yoʻnalishlariga qaratildi», – deb yozadi Asadov.