Samarqand–Toshkent–Samarqand yoʻnalishida “Afrosiyob” poyezdlarining qoʻshimcha qatnovlari yoʻlga qoʻyiladi, deb xabar bermoqda “Oʻzbekiston temir yoʻllari” matbuot xizmati.

Qayd etilishicha, 14–18-sentyabr Samarqand shahrida oʻtkazilishi belgilangan SHHT aʼzo davlatlar rahbarlari kengashining navbatdagi yigʻilishiga puxta tayyorgarlik koʻrish va yoʻlovchilar uchun qoʻshimcha qulaylik yaratish maqsadida 767/768-sonli Samarqand–Toshkent–Samarqand yoʻnalishida “Afrosiyob” tezyurar poyezdlari harakati 12-sentyabrdan 18-sentyabrgacha 7 ta reysga yoʻlga qoʻyiladi.

Reyslar quyidagi vaqt oraligʻida harakatlanadi:

767-sonli Samarqand–Toshkent yoʻnalishidagi poyezd “Samarqand” vokzalidan soat 11:08 da joʻnab, “Toshkent–Markaziy” vokzaliga soat 13:18 da yetib boradi.

768-sonli Toshkent–Samarqand yoʻnalishidagi poyezd “Toshkent–Markaziy” vokzalidan 13:40 da joʻnab, “Samarqand” vokzaliga soat 15:48 da yetib boradi.

Chiptalarni nafaqat temir yoʻl kassalaridan, balki elektron tarzda ushbu havola orqali xarid qilish mumkin.