Toshkent viloyatida erkak 6-sentyabr kuni farzandlarini Labo yukxonasiga oʻtqazib, maktabga olib borib qoʻydi. Shundan soʻng haydovchiga nisbatan tegishli chora koʻrildi.

Ushbu holat aks etgan video ijtimoiy tarmoqlarda tarqalgach, viloyat yoʻl harakati xavfsizligi boshqarmasi xodimlari tomonidan qidiruv ishlari olib borilgan va erkak shaxsi aniqlangan. U bilan olib borilgan suhbatda maʼlum boʻlishicha, maktab masofasi uzoq ekani va u tomonga transport qatnamasligi sababli erkak farzandlarini maktabga tashlab qoʻyish uchun ketayotgan boʻlgan. Mashinadagi yoʻlovchi uchun moʻljallangan oʻrinda oʻz otasi ketayotgani sababli 2 farzandini yukxonada olib ketishga qaror qilganini bildirgan.