Aholini toza ichimlik suvi bilan taʼminlash maqsadida 851 mln 458 ming soʻm mablagʻ xayriya sifatida sarflangan. Bu haqida  “Vaqf” xayriya jamoat fondi axborot xizmati rahbari Saidabror Umarov maʼlum qildi.

Taʼkidlanishicha, “Vaqf” xayriya jamoat fondi tomonidan “Vaqf suvlari” loyihasi joriy etilgan. Oʻtgan davr mobaynida homiylar bilan hamkorlikda mamlakatning turli hududlaridagi, olis qishloq va ovullarida toza ichimlik suviga muhtoj boʻlgan aholi uchun artezian quduqlari qazib chiqarish hamda minorali suv inshootlari barpo etish ishlarini amalga oshirib kelmoqda.

Jumladan:

• 2019-yilda Surxondaryo viloyati, Sariosiyo tumanidagi “Bogʻi Obod”, «Sebzor» va “Ehtirom” mahallalarida istiqomat qilayotgan 8 ming nafarga yaqin aholini toza ichimlik suvi bilan taʼminlash maqsadida bir kilometr masofadan ichimlik suvi tarmogʻi tortib kelinib, aholi toza ichimlik suvi bilan taʼminlangan;
•  
• Samarqand viloyati Nurobod tumani “Oqsoy” mahalla fuqarolar yigʻini hududiga ham aholi uchun xayriya sifatida 2 km masofadan toza ichimlik suvi keltirilgan.
•  

2020−2021-yillarda Qoraqalpogʻiston Respublikasining 10 ta tumanidagi ichimlik suvi tanqis boʻlgan qishloq va ovullarda jami 100 ta, 2021−2022-yillarda esa Fargʻona viloyatida 1 ta va Qashqadaryo viloyatining Koson, Qamashi va Gʻuzor tumanlarida 5 ta artezian quduqlari va minorali suv inshootlari bunyod etilib mahalliy aholi uchun xayriya sifatida taqdim etilgan.