Oʻzbekiston prezidenti Shavkat Mirziyoyev Saudiya Arabistoniga qilgan davlat tashrifi davomida mamlakat podshohi Salmon bin Abdulaziz Ol Saudni “Oliy darajali Imom Buxoriy” ordeni bilan mukofotladi. Bu haqida Prezident matbuot xizmati xabar berdi.

Mazkur orden yaqinda – 15-avgust kuni taʼsis etilgan boʻlib, Salmon bin Abdulaziz ushbu mukofotga sazovor boʻlgan birinchi inson boʻldi.

Orden bilan ilm-fan va madaniyat, jumladan, islom maʼrifati rivojiga hissa qoʻshgan buyuk alloma va mutafakkirlarning hayoti va ilmiy merosini oʻrganish hamda targʻib qilishda katta yutuqlarga erishgan fuqarolar mukofotlanadi.