Samarqandda ochilgan ushbu muzeyda Turkistonda jadidchilik harakati yetakchisi Mahmudxo‘ja Behbudiy ijodi va hayoti to‘g‘risidagi ma’lumotlar, o‘sha davr madaniyati, ilm-fan va ta’lim rivojiga hissa qo‘shgan bir qancha ma’rifatparvar olimlarning fotosuratlari, ilmiy asarlari mavjud.

Ekspozitsiyadan, shuningdek, XX asr boshlariga tegishli noshirlik dastgohi, gazeta va jurnallar nusxalari, ilmiy arxiv hujjatlari va nodir ashyolar o‘rin olgan.

– Bu binoda "Samarqand" gazetasi, "Oyina" jurnali chop etilgan, – deydi SamDChTI o‘qituvchisi Dilafro‘z Rahmatova. – ''Padarkush'' dramasi ham ilk bor shu bino hovlisida sahnalashtirilgan.