Hindistonning Chennay shahrida oʻtkazilgan 44-Butunjahon shaxmat olimpiadasida chempionlikni qoʻlga kiritgan Oʻzbekiston jamoasi Toshkentga qaytib keldi.

Ularni tantanali kutib olish marosimida bosh vazir Abdulla Aripov ishtirok etib, Prezident tabrigini yetkazdi va mukofotlarni topshirdi.

Jahongir Vohidov, Nodirbek Abdusattorov, Nodirbek Yakubboyev, Javohir Sindorov va Shamsiddin Vohidov 600 mln soʻmdan pul mukofoti, Equinox avtomobili hamda “Oʻzbekiston iftixori” medali bilan taqdirlandi.

Shuningdek, 200ga yaqin jamoa ichida 31-oʻrinni qoʻlga kiritgan ayollar jamoasi aʼzolari – Nilufar Yakubboyeva, Umida Omonova, Marjona Malikova, Maftuna Bobomurodova va Afruza Hamdamova “Kelajak bunyodkori” medali bilan mukofotlandi.