Milliy matbuot markazida Oʻzbekiston milliy teleradiokompaniyasi tarixi, rivojlanish bosqichlari, bugungi kundagi faoliyatiga bagʻishlagan uchta kitob taqdimoti oʻtkazildi.

Ulardan biri “Oʻzbekiston milliy teleradiokompaniyasi: zamon bilan hamqadam” kitob-albomi. Unda tarixiy fotosuratlar va teleradiokanallarning tadrijiy rivojlanish bosqichlari, keyingi yillarda erishilgan yutuqlar, foydalanilayotgan zamonaviy texnologiyalar aniq dalil hamda raqamlarga tayangan holda aks ettirilgan. 

Taʼkidlanishicha, televideniyeda oʻziga xos maktab yaratgan sanʼat arbobi Mahkam Mahammedov, xalq artisti Galina Melnikova, oliy toifali suxandon Nasiba Ibrohimova, xizmat koʻrsatgan jurnalist Tursun Qoratoyev, xizmat koʻrsatgan artist Farhod Bobojonov kabi oʻnlab ustozlarning qiziqarli xotiralari “Televideniye mening taqdirimda” ilmiy-ommabop toʻplamidan oʻrin olgan.

“Radio va televideniye” kitobida esa teleradio jurnalistikasi taraqqiyot bosqichlari, janr xususiyatlari hamda sohaga salmoqli hissa qoʻshgan va qoʻshayotgan jurnalist, rejissyor, diktor-boshlovchilar hayoti va ijodi, shuningdek, bugun yurtimizda faoliyat koʻrsatayotgan davlat va nodavlat teleradiokanallar haqida soʻz boradi. 

Taqdimotda soʻzga chiqqanlar oliy oʻquv yurtlari, ilmiy tadqiqot markazlari OʻzMTRK bilan doimiy hamkorlik istagini bildirayotgani, teleradio yoʻnalishida koʻplab ilmiy-monografik asarlar nashr etilayotganini alohida taʼkidladilar. Milliy teleradiokompaniya faoliyatini ilmiy oʻrganish koʻlamini yanada kengaytirish, sohaga doir fundamental tadqiqotlar hajmini oshirish maqsadida “Radio va televideniye” ilmiy-tadqiqot kengashi tashkil etilayotgani toʻgʻrisida maʼlumot berildi.