Oʻzbekiston prezidenti Shavkat Mirziyoyevning taklifiga binoan Ozarboyjon prezidenti Ilhom Aliyev 21-iyun kuni davlat tashrifi bilan mamlakatga keldi.

Foto: Prezident matbuot xizmati

Prezident matbuot xizmati xabariga koʻra, Toshkent xalqaro aeroportida oliy martabali mehmonni Oʻzbekiston bosh vaziri Abdulla Aripov va boshqa rasmiy shaxslar kutib oldi.

Tashrif asosiy tadbirlari bugun boʻlib oʻtadi. Oliy darajadagi muzokaralarda Oʻzbekiston bilan Ozarboyjon oʻrtasidagi strategik sheriklik munosabatlarini yanada mustahkamlash va koʻp qirrali hamkorlikni kengaytirish masalalari muhokama qilinadi.

Qayd etilishicha, muzokaralar natijalari boʻyicha sanoat, transport, qishloq xoʻjaligi, energetika, ilm-fan va innovatsiyalar, turizm va boshqa sohalarga doir ikki tomonlama hujjatlar imzolanishi koʻzda tutilgan.

Ertaga Xiva shahridagi tarixiy yodgorliklarni ziyorat qilish rejalashtirilgan, deyiladi rasmiy maʼlumotda.