Prezident Shavkat Mirziyoyev Farg‘ona viloyati Furqat tumanidagi “Usta Yusufjon naqqosh” oilaviy korxonasida bo‘ldi. Bu haqida Prezident matbuot xizmati xabar bermoqda. 

Ta’kidlanishicha, korxona rahbari Muhammadali Yunusov milliy yog‘och o‘ymakorligi maktabining munosib davomchisi. Uning ishlari O‘zbekistondagi ko‘plab maqbara va yangi majmualarga ko‘rk bag‘ishlagan. “Qo‘ligul” hunarmand O‘zbekiston xalq ustasi unvoniga sazovor bo‘lgan.

Shuningdek, Muhammadali Yunusov ijodida “pargori”, “sharafa”, “muqarnas” va “islimiy” uslublar ustuvor. Naqshinkor ustunlar, kursi, lavh, quticha va boshqa oilaviy buyumlar hamisha xaridorgir.

Qayd etilishicha, ustaning shogirdlari ko‘p. Shu bois korxonaga keng sharoit yaratish maqsadida yangi bino qurilmoqda.

“Ota-bobolarimizdan meros hunarni asrab-avaylab, yosh avlodga yetkazayotganingiz, yoshlarni ishli qilayotganingiz uchun rahmat”,– deydi Prezident. – Bunday hunarmandchilik turlarini yanada ommalashtirish kerak. Bu ham madaniyat, ham ma’rifat, ham iqtisodiyot. Bunda tashqari, davlat rahbari mazkur oilaviy korxona yonida maktab tashkil etish, unda hunarlar bilan birga matematika, geometriya, fizika, kimyo kabi fanlarni ham chuqurlashtirib o‘qitish muhimligini ta’kidlagan. Toshkent, Samarqand, Xiva va Buxoroda ham shu kabi yog‘och o‘ymakorligi markazlari tashkil etish bo‘yicha topshiriq bergan.