Ijtimoiy tarmoqlarda qoʻshni davlatlarda tahsil olayotgan barcha talabalarga test-sinovlarsiz, toʻlovlarsiz, soddalashtirilgan tartibda yozgi “perevod” qilib, Oʻzbekistonda oʻqishlari mumkinligi haqida yozilgan hujjat tarqalmoqda. Oliy va oʻrta maxsus taʼlim vazirligi axborot xizmati rahbari Moʻmin Ibodov ushbu hujjatning soxta ekanini maʼlum qildi.

Qayd etilishicha, xorijdan oʻqishni koʻchirish boʻyicha Oliy va oʻrta maxsus taʼlim vazirining birinchi oʻrinbosari K.Karimov imzosi tushirilgan xat va undagi maʼlumotlar hech qanday asosga ega emas, yolgʻon.

“OTMga oʻqishni koʻchirishga doir har qanday xabarning haqiqiyligini avval vazirlikning telegramdagi @eduuz rasmiy kanali orqali tekshirib koʻrishingizni tavsiya etamiz”, deyiladi xabarda.