Kecha, 30-mart kuni "Parkent" ijod uyida "Navro‘z – yangilanish, mehr-oqibat va qadr-qimmat ayyomi" nomli bayram tadbiri hamda jurnalistlar uchun press tur tashkil etildi.

Tadbirda O‘zbekiston Respublikasi Prezidentining maslahatchisi –  Spichrayter Xayriddin Sultonov, Respublika Ma’naviyat va ma’rifat markazi rahbari Minhojiddin Mirzo, Yozuvchilar uyushmasi raisi Sirojiddin Sayyid, O‘zbekiston xalq shoiri Mahmud Toir, Toshkent viloyati hokimi Zoir Mirzayev hamda yurtimizda ijod qilayotgan taniqli shoir-yozuvchilar, yosh ijodkor va san’atkorlar ishtirok etdi. So‘zga chiqqanlar bugungi kunga shukronalik keltirib, tinchlikning qadriga yetish kerakligini aytishdi. O‘qilgan she’rlar, ijro etilgan kuy-qo‘shiqlar yig‘ilganlarga bahoriy jo‘shqinlik bag‘ishladi.

Navro‘z sayli davomida ommaviy axborot vositalari xodimlari bir paytning o‘zida 64 kishini bag‘riga sig‘dira oladigan ijod uyi faoliyati bilan yaqindan tanishdilar. Zamonaviy andozalar asosida qurilgan kutubxona, oshxona, choyxona, ochiq ayvon, qishki va yozgi suzish havzasi hamda 150 o‘rinli amfiteatrni ko‘zdan kechirishdi.