Surxondaryo viloyati Qumqoʻrgʻon tumani aholisi uchun Navroʻz bayramlari allaqachon boshlangan. Kuni kecha tumanning Elobod mahallasi, Ornali qishlogʻidagi keng adirlik yon-bagʻirlarida umumxalq bayram sayli boʻlib oʻtdi.

Bayram davomidagi bahoriy taomlar, sumalak sayli, xalq oʻyinlari, kurash musobaqalari, sportning turli yoʻnalishlaridagi bellashuvlar, milliy urf va anʼanalarini oʻzida jam etgan marosimlar tuman ahliga manzur boʻldi. Shuningdek, doshqozonlarda xalqqa osh tarqatildi.

Taniqli sanʼatkorlar Sevinch Isroilova, “Qah-qaha” jamoasi hamda tuman Madaniyat boʻlimi ijodkorlarining chiqishlari bayramga yanada koʻtarinki kayfiyat bagʻishladi.