Ijtimoiy tarmoqlarda Samarqand viloyati Paxtachi tumanida bozor nazoratchisi yoshi katta erkakni “samosud” qilgani aytilgan xabar tarqaldi. Viloyat Ichki ishlar boshqarmasi holatga munosabat bildirdi.

Qayd etilishicha, 3-mart kuni Paxtachi tumani “Tadbirkor” mahallasida joylashgan dehqon bozorida Narpay tumani “Tepa” mahallasida yashovchi X.K. (1965-yilda tugʻilgan) hamda Paxtachi tumani “Qoratepa” mahallasida yashovchi X.D. (1975-yilda tugʻilgan) oʻrtasida kelishmovchilik yuzaga kelgan. Holatga bozor nazoratchisi aralashib, ularni ajratgan va IIB xodimlariga xabar bergan.

Hodisa joyiga xodimlar borib, fuqarolar IIB binosiga olib kelingan. Hozirda holat yuzasidan tergovga qadar tekshiruv harakatlari olib borilmoqda.