Endilikda har yili maktablarda xorijiy tillarni oʻqitilishini takomillashtirish uchun mahalliy byudjetdan 1 mlrd soʻm ajratiladi. Bu haqida AOKAda boʻlib oʻtgan brifingda Xorijiy tillarni oʻrganishni ommalashtirish agentligi axborot xizmati rahbari maʼlum qildi.

Taʼkidlanishicha, Vazirlar Mahkamasining 19-yanvardagi “Xorijiy tillarni oʻrganishni takomillashtirish boʻyicha qoʻshimcha chora-tadbirlar toʻgʻrisida” gi 34-sonli qaroriga muvofiq Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan har yili tuman (shahar)dagi maktablarni xorijiy tillarni oʻqitish uchun zarur boʻlgan adabiyotlar, asbob-uskunalar, zamonaviy axborot texnologiyalari bilan taʼminlash uchun mahalliy byudjetlardan 1 mlrd soʻmdan kam boʻlmagan miqdorda ajratilgan mablagʻlar Agentlik bilan kelishilgan manzilli dasturlar asosida sarflanadi.