Oʻzbekistonga 21-yanvar, juma kuni Kaspiy dengizidan sovuq antitsiklon kirib kelib, shanba kuni respublikaning barcha hududlarini qamrab oladi, deb xabar bermoqda “Oʻzgidromet”.

Qayd etilishicha, 22-yanvar kuni Oʻzbekistonda bulutli va sovuq ob-havo boʻlishi kutilmoqda. Respublika boʻyicha yomgʻir va qor koʻrinishidagi biroz yogʻingarchilik boʻladi, togʻli hududlarda qor yogʻadi. Harorat kunduzi 0-5 daraja iliqdan oshmaydi.

21—22-yanvar kunlari sovuq front oʻtishida respublika boʻyicha shamol 17-22 metr/sekundgacha kuchayishi mumkin.

Yakshanba kuni yogʻingarchilik toʻxtaydi, faqat respublikaning togʻ oldi va togʻli hududlarida biroz yogʻingarchilik saqlanib turadi. Kechasi sovuq kuchayadi va 0-5 daraja sovuq, shimolda 5-10 daraja sovuq atrofida boʻladi. Kunduzi havo harorati 3-8 daraja iliqni tashkil etadi.

Dam olish kunlari, shuningdek, siklon taʼsirida tuman hosil boʻladi, yoʻllarning koʻrinish darajasi yomonlashadi.