Ўзбекистон вакиллари Франция билан фуқароларни қонуний ва тизимли ишга жойлаштириш бўйича янги келишувларга эришди. Эндиликда 2026 йил ёзидан бошлаб пилот лойиҳа доирасида 50 нафар номзод ишга юборилади.

Маълумот берилишича, Миграция агентлиги, Ташқи ишлар вазирлиги ҳамда элчихона вакилларидан иборат делегация Францияда ҳамюртларни қонуний бандликка жалб этиш бўйича қатор учрашувлар ўтказган.

Музокаралар давомида Франция Қишлоқ хўжалиги ишлаб чиқарувчилари федерацияси (ФНСЕА) билан ўзбекистонликларни узумзорлардаги мавсумий ишларга жалб қилиш бўйича келишувга эришилган. Унга кўра, ёз ойларидан бошлаб Францияда ишлаш истагини билдирган 50 нафар номзод пилот лойиҳа асосида ушбу давлатга юборилади.

Шу билан бирга, Францияда кадр танлаш ва бандликни таъминлашга ихтисослашган Sélect Recruiting Service ташкилоти билан номзодларни саралаш ва ишга жойлаштириш бўйича битим имзоланган. Мазкур ҳужжат орқали Францияга ишга юбориладиган фуқароларни танлаш ва жойлаштириш жараёнларини тизимли ташкил этиш кўзда тутилган.

Томонлар таълим ва иш интеграцияси йўналишида ҳам ҳамкорликни бошлаган. Хусусан, CFA AC Paris компанияси билан “таълим + иш” форматида ҳамкорлик йўлга қўйилган.

Мазкур дастур доирасида Францияда ресторан соҳасида ўқиш ва ишлаш имкониятларини яратиш бўйича алоҳида дастур ишлаб чиқилади. Бу эса ўзбекистонлик ёшлар учун хорижда бир вақтнинг ўзида касб ўрганиш ва даромад топиш имконини яратади.

Келишувларни амалга ошириш ва ташкилий-ҳуқуқий масалаларни мувофиқлаштириш мақсадида Франция Ташқи ишлар, Ички ишлар ва Таълим вазирликлари, France Travail давлат бандлик хизмати, CCI Î-де-France Савдо-саноат палатаси ҳамда AP-ҲП Париж давлат шифохоналари хизмати билан ҳам музокаралар ўтказилган.