Qirg‘iziston prezidenti Sadir Japarov O‘sh viloyati Oloy tumani aholisi bilan uchrashuvda mamlakatdagi qishloq va ovullarga ortiq insonlar ismini qo‘ymaslik va ruscha nom bermaslik haqida gapirdi.

Mamlakat rahbari ushbu masalaga mahalliy aholining qishloqlardan biriga Olimbek dodho nomini berish borasidagi savoliga javoban to‘xtaldi:

“Sizlar guruhlarga bo‘linib, nega falonchining emas, boshqasining nomi berildi, bunga mening ajdodlarim munosibroq edi, deya bahslashishni boshlaysizlar. Biz buni ko‘p marta boshdan kechirganmiz. Shunday ekan, xafa bo‘lmang, Olimbek dodhoning ismi allaqachon tarixga o‘chmas qilib yozilgan. Qishloqqa uning nomi berilishi bilan u tezroq rivojlanib qolmaydi”, deydi u.

Japarov shuningdek, milliy o‘zlik va madaniy merosni mustahkamlash maqsadida respublika bo‘yicha ruscha nom berilgan barcha qishloqlar nomlarini o‘zgartirish rejasi haqida gapirdi. Unga ko‘ra, bu jarayon kelasi yil yakuniga qadar tugatiladi.