Fransiya shimoli, Pa-De-Kale departamentidagi Nyo-le-Min kommunasi, Betyun va Lans shaharlari oʻrtasidagi temiryoʻlda TGV tezyurar poyezdi va harbiy yuk mashinasi avariyaga uchradi.

Oqibatda poyezd relsdan chiqib ketib, mashinisti halok boʻlgan, 27 kishi jarohatlangan. Ikki nafar jabrlanuvchining ahvoli ogʻir, yana 14 nafariniki jiddiy holatda, deb yozadi Euronews nashri Fransiya Transport vaziri Filipp Tabaroga tayanib.

Poyezdda umumiy yoʻlovchilar soni 243 nafarni tashkil etgan. Qayd etilishicha, vazir voqea joyiga sobiq mamlakat bosh vaziri Jan Kasteks va SNCF direktori bilan yetib borgan.