Toshkent viloyatida to‘rt egizak — ikki qiz, ikki o‘g‘il tug‘ildi. Bu haqda Sog‘liqni saqlash vazirligi matbuot xizmati xabar berdi.

Ma’lumot berilishicha, egizaklar Toshkent viloyatining Toshkent tumanida yashovchi Odiljon va Sevara Abdullayevalar oilasida dunyoga kelgan.

“Ular 2 yoshli qizalog‘ini tarbiyalab kelayotgan edi. Endilikda 5 nafar farzandning ota-onasiga aylandi”, deyiladi xabarda. Toshkent viloyati IIBB matbuot xizmati xabariga ko‘ra, Odiljon Abdullayev — viloyat IIBB JXX Yo‘l harakati xavfsizligi boshqarmasi xodimi.

Qayd etilishicha, chaqaloqlar Respublika perinatal markazida muddatidan oldin kesarcha kesish amaliyoti orqali dunyoga keldi. Ular 1412, 1466, 1624 va 1780 gramm og‘irlikda bo‘lib, bo‘ylari 37−38 santimetrga teng.

Ayni paytda ona va chaqaloqlarning umumiy ahvoli yaxshi bo‘lib, ular tibbiyot muassasasida xalqaro protokollar asosida parvarishlanmoqda.