O‘zbekiston Badiiy akademiyasi akademigi, usta kulol Xudoyberdi Xaqberdiyev 76 yoshda vafot etdi. U O‘zbekiston xalq rassomi Umar Juraqulovning shogirdi edi.

1968-yildan boshlab yosh Xudoyberdi Xaqberdiyev mustaqil ravishda ish boshlab, turli viloyat, respublika va xorijiy ko‘rgazmalarda qatnashib kelgan.

1970-yildan Germaniya, Fransiya, Niderlandiya, Belgiya, Daniya, Vengriya, Polshada O‘zbekiston madaniyati va san’ati kunlari doirasida tashkil etilgan ko‘rgazmalarda, shuningdek, Yaponiyada Expo-70 ko‘rgazmasida ishtirok etgan.

Usta kulolning mamlakatimiz amaliy san’atini, ayniqsa, Samarqand kulolchilik maktabini rivojlantirishdagi xizmatlari katta.

Ko‘p yillar davomida Samarqandda ko‘plab kulolchilik ustalarini yetishtirdi, 1997-2007-yillarda Xalq ta’limi boshqarmasi iqtidorli bolalar viloyat saroyida kulolchilik bo‘yicha ustoz-murabbiy bo‘lib ishladi. 2003-yilda O‘zbekiston Badiiy akademiyasining kumush medali bilan taqdirlangan edi.