Prezident administratsiyasi rahbari Saida Mirziyoyeva Qirg‘iziston prezidenti Sadir Japarov bilan uchrashdi. Tomonlar mamlakatlar o‘rtasidagi hamkorlik, shuningdek, yoshlar siyosati sohasidagi o‘zaro aloqalarni muhokama qildi. Mirziyoyeva “Zakovat” Osiyo kubogi finali uchun Bishkekka borgan.

Qirg‘iziston prezidenti Sadir Japarov 20-avgust kuni O‘zbekiston Prezidenti administratsiyasi rahbari Saida Mirziyoyevani qabul qildi. Bu haqda Qirg‘iziston prezidenti matbuot xizmati xabar bermoqda.

Tomonlar ikki tomonlama hamkorlik, jumladan, madaniy-gumanitar va ta’lim aloqalarini mustahkamlash masalalarini muhokama qildi.

Yoshlar siyosati sohasidagi hamkorlikka alohida e’tibor qaratildi. Xususan, Bishkekda ikki mamlakat yoshlari ishtirokida “Zakovat” intellektual o‘yinini o‘tkazish haqida so‘z bordi.

Muzokaralar yakunida Sadir Japarov Saida Mirziyoyevaga mas’uliyatli davlat faoliyatida muvaffaqiyatlar tiladi.

Chorshanba kuni Bishkekda Saida Mirziyoyeva va Qirg‘iziston birinchi xonimi Aygul Japarova ishtirokida “Dunyoni yaxshi tomonga o‘zgartirayotgan yetakchi ayol” forumi boshlandi.

Bugun kechqurun Qirg‘iziston poytaxtida “Zakovat” Osiyo kubogi finali bo‘lib o‘tadi.