O‘zbekiston Respublikasi prezidentining 01.07.2025 yilgi qarori bilan mamlakatda tasviriy va amaliy san’at sohasini yanada rivojlantirishga  doir qo‘shimcha chora-tadbirlar belgilandi.

Tasviriy va amaliy san’atni rivojlantirish va jahon miqyosida ommalashtirish uchun O‘zbekiston Badiiy akademiyasi faoliyatining asosiy ustuvor yo‘nalishlari bo‘ladi:

• - tasviriy va amaliy san’at hamda dizayn sohasi xodimlarini moddiy va ma’naviy qo‘llab-quvvatlash hamda ularning samarali ijod qilishi uchun zarur shart-sharoitlar yaratish;
• - iste’dodli yosh rassomlar uchun mo‘ljallangan ijodiy ustaxonalar faoliyatini tashkil etish, ularning shaxsiy va jamoaviy ko‘rgazmalarini uyushtirish;
• - iste’dodli yoshlarni kreativ loyihalarga keng jalb etish;
• - xalqaro hamkorlikni rivojlantirish va boshqalar.

O‘zbekistonning 2026—2027-yillarga mo‘ljallangan ijtimoiy va ishlab chiqarish infratuzilmasini rivojlantirish dasturi doirasida quyidagilar rejalashtirilmoqda:

• - Badiiy ko‘rgazmalar direksiyasining ko‘rgazma zalini rekonstruksiya qilish, Zamonaviy galereya binosini qurish va 40 ta ijodiy ustaxonadan iborat Yosh rassomlar markazi faoliyatini yo‘lga qo‘yish;
• - milliy usulda qog‘oz tayyorlash bo‘yicha o‘quv-ishlab chiqarish ustaxonasini yaratish;
• - Pavel Benkov nomidagi Respublika ixtisoslashtirilgan rassomlik maktabining qo‘shimcha o‘quv binosini qurish.

Hujjatda iste’dodli yosh rassomlarni ustoz-shogird an’analari asosida tarbiyalab kelayotgan taniqli ijodkorlarni Badiiy akademiyaga ajratilgan davlat byudjeti mablag‘lari hisobidan har oy mehnatga haq to‘lashning eng kam  miqdorining 1,6 baravarigacha miqdorda qo‘shimcha rag‘batlantirish nazarda tutilgan.

2026/27-o‘quv yilidan boshlab Kamoliddin Behzod nomidagi Milliy rassomlik va dizayn institutida:

• -tashqi o‘rindoshlik asosida faoliyat yuritayotgan ilmiy daraja va ilmiy unvonga ega ijodkor pedagog kadrlar mazkur ta’lim tashkilotining ilmiy salohiyat ko‘rsatkichlarida inobatga olinadi (asosiy ish joyi boshqa OTMlarda bo‘lgan xodimlar bundan mustasno);
• - institut pedagoglari tomonidan yaratilgan yuksak badiiy asarlar monografiyaga tenglashtiriladi;
• - “rangtasvir”, “amaliy san’at” va “dizayn” bakalavriat ta’lim yo‘nalishlari hamda magistratura mutaxassisliklari bo‘yicha “psixologiya” va “pedagogika” fanlaridan tahsil olgan bitiruvchilarga umumiy o‘rta ta’lim muassasalarida tasviriy san’at fanidan dars berishga ruxsat etiladi.

Shuningdek, 2025-yil 1-iyuldan boshlab Badiiy akademiya markaziy apparati va uning Qoraqalpog‘iston bo‘limi xodimlari uchun davlat byudjeti mablag‘lari hisobidan oylik rag‘batlantirish ustamasi belgilanadi:

• - xodimlarning lavozim maoshiga 200 foiz miqdorida;
• - xodimlarning lavozim maoshiga ko‘p yillik xizmat muddati uchun (xizmat ko‘rsatuvchi va texnik xodimlardan tashqari) koeffitsiyent hisobida:
• - 1 yildan 5 yilgacha — 0,3;
• - 5 yildan 10 yilgacha — 0,6;
• - 10 yildan 15 yilgacha — 0,9;
• - 15 yildan ortiq — 1,2.

Shuningdek, qaror bilan tasviriy va amaliy san’at sohasini yanada rivojlantirishga doir qo‘shimcha chora-tadbirlar dasturi tasdiqlandi.