Bugun soat 12:00 da O‘zbekiston Milliy olimpiya qo‘mitasi binosida jahon chempioni Nodirbek Abdusattorovga "Mard o‘g‘lon" davlat mukofoti hamda yangi xonadon kalitini topshirish marosimi bo‘lib o‘tdi.

Jahon chempioni Nodirbek Abdusattorovga quyidagi mukofotlar tantanali ravishda topshirildi:

Prezident maslahatchisi Abdujabbor Abduvohitov “Mard o‘g‘lon” medalini ko‘ksiga taqib qo‘ydi;

Prezident matbuot kotibi Sherzod Asadov Toshkent shahridan 2 xonali kvartira kalitini topshirdi;

Bosh vazir o‘rinbosari — turizm va sport vaziri Aziz Abduhakimov 250 mln so‘m pul mukofoti bilan taqdirladi.

Shuningdek, Nodirbekning murabbiylari Jahongir Vohidov hamda marhum Dmitriy Qayumovning oilasi 100 mln so‘mdan pul mukofoti bilan taqdirlanishdi.

Nodirbek Abdusattorov o‘z nutqida  “Xudo xohlasa, shaxmat tojini ham O‘zbekistonga olib kelamiz” deb aytdi. Nodirbekning otasi farzandlari haqida batafsil so‘zlab berdi. Bundan tashqari, otasi jurnalistlardan kichik uzr so‘radi: Nodirbekning jurnalistlarga doim ham javob berolmasligi va tadbirlarga doim ham qatnasholmasligini, kun tartibi qat’iy belgilanganligini  tushuntirdi.